रत्नागिरी : परशुरामपंत अभ्यंकर प्राथमिक विद्यामंदिरात इयत्ता पहिली व दुसरीच्या विविध स्पर्धांचे बक्षीस वितरण मत्स्य महाविद्यालयातील क्रीडा शिक्षक मंगेशकुमार पाटील यांच्या हस्ते झाले.
परशुरामपंत अभ्यंकर यांचा स्मृतिदिन व शाळेच्या वर्धापनदिनानिमित्त कार्यक्रमाचे आयोजन करण्यात आले होते. अभ्यंकर यांच्या स्मृतिदिनानिमित्त बौद्धिक, हस्ताक्षर व धावणे, मारचेंडू, लंगडी, क्रीडा स्पर्धा घेण्यात आल्या. या वेळी मुख्याध्यापक विनोद नारकर, शिक्षक महेश साळुंके उपस्थित होते. श्री. नारकर यांनी अभ्यंकर यांच्याविषयी माहिती दिली.
श्री. पाटील यांनी विद्यार्थ्यांचे अभिनंदन केले. ‘स्पर्धेत बक्षीस मिळवणे हे उद्दिष्ट न ठेवता सहभागी होणेसुद्धा महत्त्वाचे असते. पालक, शिक्षकांनी विद्यार्थ्यांना अशा प्रकारे प्रोत्साहन दिल्यास भविष्यात शाळेतून चांगले क्रीडापटू तयार होतील,’ असे त्यांनी सांगितले. या कार्यक्रमासाठी शिक्षिका ज्योती शेंडगे, संपदा सावंत, स्मिताली परब, प्रिया साळुंखे, स्वप्नाली आयरे, सेविका रोहिणी कांबळे यांनी मेहनत घेतली.
